Հայաստանը կորցրել է իր երաշխավորներին։ Այս կարծիքը հունվարի 30-ին հայտնել է Հայաստանի Հանրապետական կուսակցության գործադիր մարմնի անդամ Արտակ Զաքարյանը՝ «Հայաստանի Հանրապետությունը և Հայկական աշխարհի անվտանգությանը սպառնացող գործոնները» թեմայով բանավեճի ժամանակ։
Ըստ նրա՝ Երևանը հստակ դիրքորոշում չունի ներկայիս կառավարության նպատակների վերաբերյալ, ինչը, Զաքարյանի կարծիքով, բացի Հայաստանին վնաս հասցնելուց, ավելի է խորացնում երկրի անվտանգության խնդիրները։
Նա նշել է, որ նոր ռազմավարության մշակման գործում պետք է ներգրավվեն բոլոր սոցիալական խմբերը, քանի որ սպառնալիքները, որոնք ֆիզիկապես, կենսաբանորեն, բարոյապես և հոգեբանորեն սպառնում են երկրին, ուղղված են ոչ միայն ընդդիմությանը, այլև ամբողջ հասարակությանը։
«Երբ անվտանգությունը սպառնալիքի տակ է, ապա ոչ ոք չի հարցնի՝ ով է ընդդիմություն և ով՝ կառավարություն, ով հարուստը և ով աղքատը»,- ասել է Զաքարյանը՝ ընդգծելով, որ նման իրավիճակում առաջնային է երկրի պաշտպանությունը։
Ընդդիմադիր գործիչը համոզված է, որ առաջին հերթին պետք է մշակվի ռազմական պաշտպանության նոր մոդել, որը կհամապատասխանի ժամանակակից պահանջներին, մարտահրավերներին և իրողություններին։
Մասնավորապես, ըստ ՀՀԿ ներկայացուցչի, Հայաստանը պետք է ունենա տեխնոլոգիական և կիբեռտարածության առումով առավելություն Ադրբեջանի նկատմամբ։ «Եթե մեր բնակավայրերը գտնվում են Ադրբեջանի նշանառության տակ, ապա Ադրբեջանի կիբեռտարածությունը պետք է լինի մեր նշանառության տակ։ Այս մոտեցմամբ մենք կկարողանանք պահպանել հավասարակշռությունը»,- նշել է Զաքարյանը։