Երեկ Ռուբեն Վարդանյանը հեռախոսազրույց է ունեցել ավագ որդու՝ Դավիթ Վարդանյանի հետ։ Նա հայտնել է, որ առաջիկայում իրեն կտրվի եզրափակիչ խոսքի հնարավորություն, և իր ելույթում նա մտադիր է ընդգծել հետևյալ կարևոր մտքերը։
«Տեղի ունեցողը ես չեմ ընդունում որպես դատական գործընթաց և մտադիր չեմ մասնակցել արդարադատության իմիտացիային։ Բաքվում տեղի ունեցող այս գործընթացը չի համապատասխանում արդար դատաքննության հիմնական չափանիշներին և, հետևաբար, չի կարող համարվել դատաքննություն՝ դրա իրական իմաստով»,- ասել է նա։
Ռուբեն Վարդանյանը հստակ հրաժարվում է ճանաչել Բաքվում իր դեմ հարուցված գործը որպես օրինական դատաքննություն՝ ընդգծելով, որ այն չի բավարարում արդարադատության հիմնարար պահանջներին։
Նա նաև հստակ հակադրում է իր գործողությունները զղջումը։ «Ես ոչնչի համար չեմ զղջում։ Բոլոր իմ գործողությունները կատարել եմ գիտակցաբար և կամավոր՝ լիովին հասկանալով հնարավոր հետևանքները։ Ես պատրաստ եմ պատասխան տալ իմ արարքների համար Աստծո առաջ»,- նշել է նա՝ հավաստիացնելով, որ իր գործողությունները ղեկավարվել են գիտակցված և պատասխանատու մտածելակերպով։
Վարդանյանը նաև հայտարարել է իր անսասան վստահությունը Արցախի հանդեպ։ «Եվս մեկ անգամ հայտարարում եմ. Արցախը եղել է, կա և կլինի՝ անկախ պատմությունը վերաշարադրելու կամ իրադարձությունների այլ մեկնաբանություն պարտադրելու փորձերից»,- ընդգծել է նա՝ վերահաստատելով իր անսասան կեցվածքը և հավատը հայկական պատմության անխախտելիությանը։
Ավելի ուշ Ռուբեն Վարդանյանը հանրությանը փոխանցել է իր մտքերն ու խոսքը, որը, նրա խոսքով, պետք է լինի ոչ թե վախի, այլ խիզախության և ինքնագիտակցության կոչ։
«Պետք չէ վախենալ մահից կամ փորձել «հաղթել» նրան։ Սարսափելի է անտարբերությունը, որն աննկատ, աստիճանաբար, ասես ճառագայթում, թափանցում է մեր մեջ և ներսից քայքայում։ Մի վախեցեք հետևել ձեր սեփական ճանապարհին, փնտրել, սխալվել և մինչև կյանքի վերջ ճանաչել աշխարհը։ Կարևորը՝ սեփական ճանապարհը գիտակցաբար գնալն է»,- ասել է նա՝ կոչ անելով չվախենալ ճանապարհորդությունից և ապրել ինքնագիտակցված կյանքով։
Նրա խոսքը հասցեագրված է ոչ միայն իր աջակիցներին, այլև ցանկացած մարդու, ով փնտրում է իր ճանապարհը և ցանկանում է ապրել իմաստալից կյանքով։
Վարդանյանը նաև հավաստիացրել է, որ իր գործողությունները ղեկավարվել են բարձրագույն նպատակով՝ չվնասելն ու ներդաշնակությունը պահպանելը։ «Ամենակարևորը՝ չվնասելն է։ Չխախտել այն ներդաշնակ հավասարակշռությունը, որ գոյություն ունի բնության մեջ ու աշխարհում։ Մենք բոլորս մասնիկներն ենք մեկ ընդհանուր տարածության, որը կարող է գոյություն ունենալ միայն հավասարակշռության և ներդաշնակության մեջ»,- նշել է նա՝ ընդգծելով իր գործողությունների բարոյական հիմքերը։
Եզրափակելով իր խոսքը, Ռուբեն Վարդանյանը հայտնել է իր անսահման երախտագիտությունը և հպարտությունը։ «Ես երջանիկ եմ, որ կարող եմ լինել իմ ժողովրդի ծառան։ Երախտապարտ եմ բոլորին, ով եղել է և մնում է իմ կողքին այս դժվարին ժամանակահատվածում»,- ասել է նա՝ վերջին անգամ հավաստիացնելով իր անսասան կեցվածքը և ժողովրդի նկատմամբ անսահման սիրը։